راولپنڊي (ويب ڊيسڪ) اڊياله جيل ۾ باني پاڪستان تحريڪ انصاف ۽ اڳوڻو وزيراعظم عمران خان پنهنجي گهرواري بشريٰ بي بي سان ملاقات ڪئي. جيل ذريعن موجب ٻنهي جي ملاقات لڳ ڀڳ 45 منٽن تائين هلي، جيڪا جيل جي ڪانفرنس روم ۾ ڪرائي وئي. ملاقات دوران ٻنهي زال مڙس کي هڪ ٻئي سان وقت گذارڻ جو موقعو مليو، جڏهن ته جيل انتظاميه ملاقات جي نگراني ڪندي رهي.
ذريعن ٻڌايو ته گذريل هفتي به عمران خان ۽ بشريٰ بي بي جي ملاقات ڪرائي وئي هئي، ۽ اهي ملاقاتون جيل جي قانونن ۽ ضابطن مطابق ٿين ٿيون. جيل انتظاميه جو چوڻ آهي ته بشريٰ بي بي جي وڪيل طرفان ڪجهه ضروري سامان پڻ جيل ۾ پهچايو ويو، جنهن ۾ ڪمبل، گرم ڪپڙا، ميوا، کجورون ۽ ٻيو سامان شامل هو، جيڪي جيل انتظاميه وصول ڪري عمران خان تائين پهچايا.
ملاقات بابت ٻڌايو ويو ته اها جيل جي مقرر ڪيل ضابطن تحت ٿي، جيئن قيدين جي گهر ڀاتين سان ملاقات جو سلسلو جاري رهي. عمران خان ۽ بشريٰ بي بي جي ملاقاتن کي سياسي حلقن ۾ به وڏي دلچسپي سان ڏٺو پيو وڃي، ڇو ته باني پي ٽي آءِ جي قيد دوران گهرواري سان ملاقاتون سندن حوصلو وڌائڻ جو سبب بڻجن ٿيون.
