تهران: ايران ۾ حڪومت جي سطح تي احتجاجن دوران شرپسندن جي هٿان مارجي ويل لڳ ڀڳ 100 سيڪيورٽي اهلڪارن ۽ شهرين جي جنازي نماز ادا ڪئي وئي۔
تفصيل
ايراني ميڊيا موجب، گاڌي واري هنڌ تهران ۾ هزارين ماڻهو جنازي جلوس ۾ شامل ٿيا ۽ ميتن کي آخري آرامگاهه تائين پهچايو۔
ميتن کي وڏن ٽرڪن ۾ رکيو ويو هو، جيڪي گلن سان سينگاريا ويا هئا ۽ شهيد اهلڪارن جون تصويرون به لڳايل هيون۔
جنازي جلوس جي شرڪت ڪندڙن احتجاجي مظاهرن دوران مارجي ويل سيڪيورٽي اهلڪارن ۽ عام شهرين کي خراجِ عقيدت پيش ڪيو۔
هن موقعي تي اعليٰ سرڪاري عملدار ۽ حڪمران جماعت جا اڳواڻ پڻ موجود هئا، جڏهن ته آيت الله خامنه اي جا نمائندا به شرڪت ڪئي۔
جنازن کي مختلف قبرستانن ۾ دفن ڪيو ويو، جتي سندن وارثن مٽي ماءُ حوالي ڪيو۔ جلوس ۾ شرڪت ڪندڙن ايران جا قومي جهنڊي ۽ رهبر معظم جون تصويرون کڻي رهيا هئا۔
انساني حقن جي رپورٽ
آمريڪا ۾ قائم هيومن رائٽس ايڪٽيوِسٽس نيوز ايجنسي دعويٰ ڪئي آهي ته احتجاج کي طاقت سان دٻائڻ جي ڪوشش ۾ مارجي ويلن جو انگ لڳ ڀڳ 2500 تائين پهچي ويو آهي۔
انساني حقن جي تنظيم ٻڌايو ته سيڪيورٽي فورسز ڪريڪ ڊائون آپريشن دوران گهٽ ۾ گهٽ 18 هزار ماڻهن کي گرفتار ڪيو آهي۔
تنظيم خدشو ظاهر ڪيو آهي ته گرفتار ٿيل مظاهرين کي موت جي سزا ڏيڻ جو امڪان آهي ۽ اڄ هڪ ڦاسي جي سزا تي عملدرآمد به ڪيو ويندو۔
