ڪراچي (اسٽاف رپورٽر) سائٽ ايريا باواني چالي ۾ پوليس ۽ ڦوروئن ۾ مقابلي دوران هڪ پوليس اهلڪار سخت زخمي ٿيڻ بعد شهيد ٿي ويو، جڏهن ته هڪ ڦورو به مارجي ويو.
ڇيپا ذريعن موجب زخمي اهلڪار کي عباسي شهيد اسپتال کان آغا خان اسپتال منتقل ڪيو پئي ويو، پر هو رستي ۾ ئي زخمن جا سور نه سهندي شهيد ٿي ويو.
پوليس اختيارين مطابق شهيد اهلڪار جي سڃاڻپ واجد جي نالي سان ٿي آهي، جنهن جي عمر 27 سال هئي ۽ هو سائٽ اي ايريا ٿاڻي ۾ مقرر هو. مقابلي دوران واجد کي مٿي ۾ گولي لڳي، پر هن نهايت بهادري سان ڦوروئن جو مقابلو ڪيو.
صوبائي گهرو وزير ضيا الحسن لنجار واقعي جي اطلاع ملندي ئي ايس ايس پي ڪياماڙي کي هدايت ڪئي ته زخمي اهلڪار کي بهترين علاج جون سهولتون فراهم ڪيون وڃن ۽ اهلڪار جي وارثن سان ملاقات ڪري مڪمل پوليس سپورٽ جي يقين دهاني ڪرائي.
ايس ايس پي ڪياماڙي امجد شيخ آغا خان اسپتال پهچي شهيد اهلڪار جي وارثن سان تعزيت ڪئي، پوليس آفيسرن کان تفصيل ورتا ۽ ميڊيا سان ڳالهه ٻولهه ڪئي. بعد ۾ شهيد اهلڪار جي لاش کي ڇيپا ايمبولينس ذريعي واپس عباسي شهيد اسپتال منتقل ڪيو ويو.
پوليس موجب شهيد واجد جو تعلق مانسهره سان هو ۽ هو شادي شده هو. واقعي تي پوليس حلقن ۾ گهرو ڏک ۽ افسوس جو اظهار ڪيو ويو آهي.
