مراد علي شاهه جو گل پلازا جي ٻيهر تعمير ۽ هر دڪاندار کي پنج لک رپيا ڏيڻ جو اعلان
ڪراچي(اسٽاف رپورٽر) وزيراعليٰ سنڌ مراد علي شاهه سنڌ اسيمبلي ۾ پاليسي بيان ڏيندي گل پلازه جي ٻيهر تعمير ۽ متاثر دڪاندارن کي پهرين مرحلي ۾ پنج لک رپيا معاوضو ڏيڻ جو اعلان ڪيو.
مراد علي شاهه چيو ته گل پلازه سانحي سڄي ملڪ کي ڏک ۾ مبتلا ڪيو، اهڙا واقعا دنيا ۾ ٿيندا رهن ٿا پر انهن کي روڪڻ لاءِ قدم کڻڻ ضروري آهي. هن ٻڌايو ته واقعي ۾ 88 ماڻهو گم ٿيل رپورٽ ٿيا، جن مان 82 جو انگ درست ثابت ٿيو. هن وقت تائين 67 لاش ملي چڪا آهن، 15 ماڻهو اڃا تائين گم آهن، جڏهن ته ڊي اين اي جي عمل ذريعي سڃاڻپ جاري آهي.
وڏي وزير وضاحت ڪئي ته باهه صبح 10:14 تي گرائونڊ فلور جي هڪ دڪان مان لڳي، 10:26 تي فائر برگيڊ کي اطلاع ڏنو ويو، ۽ 10:36 تي ريسڪيو 1122 کي ڪال ڪئي وئي. هن چيو ته انڪوائري مڪمل طور تي جاري آهي ۽ ذميوارن خلاف ڪيس داخل ڪيو ويندو.
هن چيو ته گل پلازه جي لِيز ڪراچي ميونسپل ڪارپوريشن منظور ڪئي هئي، 1980ع واري ڏهاڪي ۾ تعمير مڪمل ٿي، 1991ع ۾ لِيز ۾ توسيع ڪئي وئي. مراد علي شاهه جو چوڻ هو ته ارڙهين ترميم کان اڳ جا مسئلا اڄ تائين صاف ڪرڻا پيا آهن.
وڏي وزير چيو ته حڪومت متاثرن کي معاوضو ڏيندي، 1102 منظور ٿيل دڪانن جي مالڪن کي پهرين مرحلي ۾ پنج لک رپيا ڏنا ويندا، جيڪي ڪراچي چيمبر ذريعي ورهايا ويندا. هن واپارين جو شڪريو ادا ڪيو جن هڪ سال تائين ڪرائي نه وٺڻ جو اعلان ڪيو.
هن وڌيڪ چيو ته متاثر واپارين کي ٻن سالن تائين عارضي دڪان فراهم ڪيا ويندا، هڪ ڪروڙ رپيا تائين قرض ڏنو ويندو جنهن جو سود سنڌ حڪومت ڀريندي. گل پلازه کي ڊاهي ٻيهر تعمير ڪيو ويندو ۽ ٻن سالن ۾ نئين دڪانن سان واپارين کي حوالو ڪيو ويندو.
مراد علي شاهه چيو ته حڪومت تي تنقيد ڪرڻ جو حق آهي پر اهڙي سانحي کي سياسي مقصد لاءِ استعمال ڪرڻ وڏو ڏوهه آهي. هن چيو ته ذميوارن کي سزا ملندي، جيڪڏهن سرڪاري ادارا غفلت جا ذميوار ٿيا ته انهن کي به جوابده بڻايو ويندو.
هن وفاقي وزير ڪامرس کي به چيو آهي ته ملڪ ۾ انشورنس جو نظام قائم ڪرڻ لاءِ قانون سازي ڪئي وڃي. مراد علي شاهه واضح ڪيو ته آئين ۾ ڪٿي به لکيل ناهي ته وفاق ڪنهن به صوبي کي سڌو سنئون ڪنٽرول ڪري سگهي ٿو، اسان جي ڪوشش آهي ته ارڙهين ترميم کان اڳ جا سڀ مسئلا حل ڪيا وڃن.
اسيمبلي ۾ تقرير دوران ايم ڪيو ايم ۽ جماعت اسلامي جا ميمبر احتجاجي طور بيٺا، جنهن تي اسپيڪر کين هدايت ڪئي ته رولز پڙهي پنهنجي وقت تي ڳالهائين.
