ڪراچي(اسٽاف رپورٽر) ايم اي جناح روڊ تي واقع گل پلازا ۾ لڳندڙ باهه کي ٽئين درجي جي باهه قرار ڏنو ويو آهي، جنهن جي نتيجي ۾ 5ماڻهو فوت ۽ ويهه کان وڌيڪ زخمي ٿي پيا. فوت ٿيلن ۾ آصف، فراز ۽ عامر شامل آهن، جڏهن تہ زخمين مان ڪيترن جي حالت نازڪ آهي ۽ کين سول اسپتال منتقل ڪيو ويو آهي.
باهه سبب گرائونڊ فلور جا سڀ دڪان ۽ گودام مڪمل طور تي لپيٽ ۾ اچي ويا آهن، جڏهن تہ باهه ٽئين منزل تائين پهچي وئي آهي. فائر بريگيڊ جي عملدارن موجب سڄي شهر مان فائر ٽينڊرز طلب ڪيا ويا آهن ۽ ڦاٿل ماڻهن کي اسنارڪل ذريعي ٻاهر ڪڍيو پيو وڃي.
واٽر بورڊ جي ترجمان ٻڌايو ته فائر بريگيڊ ۽ ريسڪيو 1122 جي درخواست تي فوري طور واٽر ٽينڪر روانا ڪيا ويا آهن، جڏهن تہ نِيپا ۽ صفورہ هائيڊرنٽس تي ايمرجنسي لاڳو ڪئي وئي آهي ته جيئن پاڻي جي فراهمي بنا رڪاوٽ جاري رهي. واٽر بورڊ جا عملدار فائر بريگيڊ سان مسلسل رابطي ۾ آهن ۽ پاڻي جي فراهمي يقيني بڻائي رهيا آهن.
صوبائي گهرو وزير سنڌ ضياالحسن لنجار اختيارين کي هدايت ڪئي آهي ته فوري طور ريسڪيو جا قدم کنيا وڃن، ٽريفڪ لاءِ متبادل روٽس ٺاهيا وڃن ۽ جاچ ذريعي باهه لڳڻ جا سبب معلوم ڪيا وڃن. هن زور ڏنو ته گل پلازا جي عمارت کي محفوظ بڻايو وڃي ۽ فائر بريگيڊ جي گاڏين لاءِ رستا صاف ڪيا وڃن.
سنڌ رينجرز جا جوان به امدادي ڪارروائين ۾ شامل ٿي ويا آهن. گورنر سنڌ ڪامران ٽيسوري متاثر واپارين سان ملاقات ڪري بحالي جا حڪم جاري ڪيا. ميئر ڪراچي مرتضيٰ وهاب جاني نقصان تي افسوس جو اظهار ڪندي بلديه عظميٰ جون مشينون موقعي تي موڪلي ڇڏيون آهن.
صحت واري وفاقي وزير مصطفىٰ ڪمال فوت ٿيلن جي وارثن سان همدردي جو اظهار ڪيو ۽ زخمين جي علاج لاءِ بهترين سهولتن جي فراهمي جي هدايت ڪئي. هن چيو ته وفاقي سطح تي سنڌ حڪومت کي هر ممڪن مدد فراهم ڪئي ويندي ۽ ريسڪيو ادارن کي هدايت ڪئي ته ڦاٿل ماڻهن کي فوري طور محفوظ جاءِ تي منتقل ڪيو وڃي.
اسپيڪر سنڌ اسيمبلي اويس قادر شاهه ۽ اپوزيشن ليڊر علي خورشيدي به جاني نقصان تي افسوس جو اظهار ڪيو آهي. اپوزيشن ليڊر هن واقعي کي سانحو قرار ڏيندي چيو ته آتشزدگي تي ضابطو آڻڻ لاءِ مؤثر قدم نه کڻڻ افسوس جوڳو عمل آهي.
گل پلازا ۾ لڳل باهه سبب شهر ۾ خوف ۽ بيچيني جي فضا آهي، جڏهن تہ ريسڪيو ۽ امدادي ڪارروائيون اڃا تائين جاري آهن.
