اسلام آباد(ويب ڊيسڪ) وفاقي حڪومت افغان پناهگيرن جي واپسي کان پوءِ 40 سال پراڻي ڪئمپن کي بند ڪرڻ جو فيصلو ڪيو آهي.
وفاقي حڪومت خيبر پختونخواهه ۾ پنج افغان پناهگير ڪئمپن کي بند ڪرڻ جو حڪم ڏنو آهي. ڪشمير معاملن ۽ گلگت بلتستان جي وزارت ڪئمپن کي بند ڪرڻ جو نوٽيفڪيشن جاري ڪيو آهي.
ڪيمپن جي زمين صوبائي حڪومت ۽ لاڳاپيل ڊپٽي ڪمشنرن جي حوالي ڪرڻ جو حڪم ڏنو ويو آهي.
بند ٿيل ڪئمپن مان ٽي هري پور ضلعي ۾ هئا، جڏهن ته هڪ چترال ضلعي ۾ ۽ هڪ اپر دير ۾ هو. هري پور ۾ 40 سال پراڻي پنيان ڪئمپ ۾ 100,000 کان وڌيڪ پناهگير رهائش پذير هئا.
يو اين ايڇ سي آر جي مطابق، افغان پناهگيرن جو سڀ کان وڏو انگ هن وقت خيبر پختونخوا ۾ آهي.
خيبر پختونخوا جي وڏي وزير علي امين گنڊاپور افغان پناهگيرن جي جبري واپسي جي خلاف بيان ڏنو آهي.
ياد رهي ته ڪجهه ڏينهن اڳ خيبر پختونخوا جي اطلاعات صلاحڪار افغان پناهگيرن جي واپسي جي عمل کي فوري طور تي روڪڻ جو مطالبو ڪيو هو.
