اسلام آباد (ويب ڊيسڪ) وفاقي حڪومت غير قانوني طور تي پاڪستان ۾ رهندڙ افغان مهاجرن کي بنا ڪنهن اضافي مهلت جي فوري طور تي واپس موڪلڻ جو فيصلو ڪري ڇڏيو آهي. صرف اهي افغان شهري ملڪ ۾ رهڻ جي اجازت حاصل ڪندا، جن وٽ صحيح ويزا موجود هوندي.
وزيراعظم شهباز شريف جي صدارت هيٺ وزيراعظم آفيس ۾ افغان مهاجرن جي واپسي بابت اعليٰ سطحي اجلاس منعقد ٿيو، جنهن ۾ آرمي چيف فِيلڊ مارشل سيد عاصم منير، وفاقي وزير، آزاد ڪشمير جي وزيراعظم، چارئي صوبن ۽ گلگت بلتستان جي وزراءِ اعليٰ، خيبرپختونخوا جي نمائندي ۽ اعليٰ حڪومتي آفيسرن شرڪت ڪئي.
اجلاس دوران وزيراعظم چيو ته خيبرپختونخوا وفاق جي اهم اڪائي آهي، ۽ وفاقي حڪومت ان جي ترقي ۽ عوام جي فلاح لاءِ مڪمل سهڪار جاري رکندي. هن ٻڌايو ته هڪ ڏينهن اڳ خيبرپختونخوا جي وزيراعليٰ سان ٽيليفون تي ڳالهه ٻولهه ٿي، جنهن ۾ مڪمل تعاون جي خاطري ڏني وئي.
اجلاس ۾ بريفنگ دوران ٻڌايو ويو ته 16 آڪٽوبر 2025 تائين 14 لک 77 هزار 592 افغان شهري واپس موڪليا ويا آهن، ۽ هي عمل مرحليوار جاري آهي. غير قانوني طور تي رهندڙ افغانن کي ڪا به اضافي مهلت نه ڏني ويندي.
حڪام ٻڌايو ته افغان مهاجرن جي جلد ۽ باعزت واپسي لاءِ سرحدي ايگزٽ پوائنٽن جي تعداد وڌائي پئي وڃي. غير قانوني افغانين کي پناهه ڏيڻ يا گيسٽ هائوسز ۾ رهائش فراهم ڪرڻ قانوني جرم آهي، جنهن جي نشاندهي جو عمل جاري آهي.
وزيراعظم شهباز شريف هدايت ڪئي ته واپسي جي عمل دوران بزرگن، عورتن، ٻارن ۽ اقليتن سان عزتدار رويو اختيار ڪيو وڃي، ۽ عوام کي به هن عمل ۾ شامل ڪيو وڃي. هن چيو ته پاڪستان ڪيترن ئي ڏهاڪن تائين افغان ڀائرن جي ميزباني ڪئي، پر هاڻ وقت اچي ويو آهي ته انهن جي محفوظ واپسي کي يقيني بڻايو وڃي.
وزيراعظم چيو ته پاڪستان دهشتگردي خلاف جنگ ۾ هزارين قيمتي جانيون قربان ڪيون ۽ اربين ڊالر جو معاشي نقصان برداشت ڪيو. افغانستان جي زمين مان پاڪستان تي دهشتگرد حملا ۽ انهن ۾ افغان شهرين جي ملوث هجڻ انتهائي ڳڻتي جوڳي ڳالهه آهي.
هن ٻڌايو ته نائب وزيراعظم، پرڏيهي وزير، دفاع واري وزير ۽ ٻين اعليٰ آفيسرن ڪيترائي ڀيرا ڪابل وڃي افغان نگران حڪومت سان ڳالهه ٻولهه ڪئي ته جيئن افغان زمين کي دهشتگردي لاءِ استعمال ٿيڻ کان روڪيو وڃي، پر هاڻ پاڪستاني عوام سوال ڪري رهيو آهي ته حڪومت ڪيتري دير تائين افغان مهاجرن جو بار کڻندي رهندي؟
وزيراعظم تازو افغان سرحدي حملو ياد ڏياريندي چيو ته پاڪستان جي بهادر فوج دشمن کي منهن ٽوڙ جواب ڏنو. هن فِيلڊ مارشل سيد عاصم منير جي قيادت ۾ پاڪ فوج جي پيشه ورانه صلاحيتن کي ساراهيندي چيو ته فوج نه صرف افغان جارحيت، پر ڀارتي جارحيت دوران به ثابت ڪيو ته هو وطن جي دفاع جي مڪمل صلاحيت رکي ٿي.
اجلاس جي آخر ۾ فيصلو ڪيو ويو ته افغان مهاجرن جي واپسي بابت سڀني سفارشات تي سختي سان عمل ڪيو ويندو. وزيراعظم صوبن کان مڪمل تعاون جي اپيل ڪندي واضح ڪيو ته نئشنل ايڪشن پلان تحت ملڪ جي دفاع، استحڪام ۽ قانون جي بالادستي لاءِ سڀ ادارا گڏجي ڪم ڪندا.
صوبائي نمائندن ۽ وزراءِ اعليٰ پاڪستان جي سفارتي ڪاميابين جي واکاڻ ڪئي ۽ وزيراعظم شهباز شريف ۽ فِيلڊ مارشل سيد عاصم منير جي ڪردار کي خراجِ تحسين پيش ڪيو.
