لاهور(ويب ڊيسڪ) پنجاب جي اطلاعات ۽ ثقافت واري وزير عظميٰ بخاري چيو آهي ته تحريڪ لبيڪ پاڪستان (ٽي ايل پي) تي پابنديءَ بابت وفاقي حڪومت جو فيصلو ڪجهه ئي وقت ۾ امڪان آهي.
ڊي جي پي آر ۾ پريس ڪانفرنس دوران عظميٰ بخاري چيو ته صوبي جي امن لاءِ هر ممڪن قدم کنيا ويندا، پنجاب جي امن کي خراب ڪرڻ جي ڪنهن کي اجازت نه ڏني ويندي، قانون هٿ ۾ وٺندڙن خلاف سخت ڪارروائي ڪئي ويندي، هٿياربند جٿن کي رياستي رٽ چئلينج ڪرڻ نه ڏنو ويندو.
هن ٻڌايو ته اسان جو دين هر انسان سان حسن سلوڪ جو درس ڏئي ٿو، پنجاب ۾ هن وقت 10 لک کان وڌيڪ ماڻهن وٽ ذاتي هٿيار موجود آهن، 28 هٿيار ڊيلرن جا لائسنس منسوخ ڪيا ويا آهن، هاڻ نئون لائسنس جاري نه ڪيو ويندو.
عظميٰ بخاري موجب جن هٿيار ڊيلرن وٽ لائسنس نه هو، انهن جون دڪانون سيل ڪيون ويون آهن، 511 ڊيلرن لائسنس جي توثيق لاءِ درخواست ڏني آهي، جڏهن ته 90 ڊيلرن جي ڪاغذن جي جاچ جاري آهي.
هن چيو ته هڪ انتهاپسند جماعت جي مستقبل بابت فيصلو وفاق جلد ڪندو، غزه ۽ فلسطين جي آزادي لاءِ نڪتل ماڻهن طرفان املاڪ کي نقصان پهچايو ويو، پنجاب ۾ 10 لک 12 هزار 454 ماڻهن وٽ ذاتي هٿيارن جا لائسنس موجود آهن، جن وٽ لائسنس آهي، اهي ان کي خدمت مرڪزن ۾ رجسٽرڊ ڪرائين.
وزير اطلاعات جو چوڻ هو ته ٽي ايل پي بابت فيصلو جلد متوقع آهي، جڏهن ته رضوي ڀائرن جي گرفتاري انساني جانن جي تحفظ لاءِ ضروري آهي، ٻنهي ڀائرن کي جلد گرفتار ڪيو ويندو.
هن وڌيڪ چيو ته مذهبي جماعت جي احتجاج دوران پوليس اهلڪارن تي تشدد ڪيو ويو، پوليس جي گاڏيون ڦٻايون ويون، شهرين جي املاڪ کي نقصان پهچايو ويو ۽ گاڏين کي باهه ڏني وئي.
