اسلام آباد (ويب ڊيسڪ) سپريم ڪورٽ آف پاڪستان، اسلام آباد هاءِ ڪورٽ جي جج جسٽس طارق محمود جهانگيري کي عدالتي ڪم کان روڪڻ وارو حڪم معطل ڪري ڇڏيو آهي.
جسٽس امين الدين خان جي سربراهيءَ ۾ پنج رڪني آئيني بينچ، جنهن ۾ جسٽس جمال خان مندوخيل، جسٽس محمد علي مظهر، جسٽس حسن اظهر رضوي ۽ جسٽس شاهد بلال حسن شامل هئا، هن معاملي جي ٻڌڻي ڪئي.
اسلام آباد هاءِ ڪورٽ جا پنج جج، جن ۾ جسٽس طارق جهانگيري، جسٽس محسن اختر ڪياني، جسٽس بابر ستار، جسٽس اعجاز اسحاق ۽ جسٽس ثمن رفعت امتياز شامل هئا، عام سائلن واري رستي کان سپريم ڪورٽ ۾ داخل ٿيا.
سماعت دوران جسٽس طارق جهانگيري کان مبينا جعلي ڊگري بابت سوال ڪيو ويو. صحافي پڇيو ته ڇا هو عدالت ويندا، ڇو ته ڪراچي يونيورسٽي سندن ڊگري منسوخ ڪري ڇڏي آهي؟ جسٽس جهانگيري جواب ڏنو ته هن سنڌ هاءِ ڪورٽ ۾ درخواست داخل ڪئي آهي، ۽ حيرت جو اظهار ڪيو ته 34 سالن بعد ڊگري منسوخ ڪئي پئي وڃي، جيڪو دنيا جي تاريخ ۾ ناياب واقعو آهي.
جسٽس جمال خان مندوخيل ريمارڪس ڏنا ته سپريم ڪورٽ اڳ ئي فيصلو ڪري چڪي آهي ته ڪنهن جج کي عدالتي ڪم کان روڪڻ قانوني طور جائز ناهي. جسٽس طارق جهانگيري جي وڪيل منير اي ملڪ دليل ڏنو ته عبوري حڪم ذريعي جج کي عدالتي ڪم کان روڪڻ انصاف جي تقاضائن جي خلاف آهي، ۽ سپريم جوڊيشل ڪائونسل ۾ شڪايت جي موجودگي تائين اهڙو قدم غير مناسب آهي.
سماعت جي پڄاڻي تي جسٽس امين الدين ۽ جسٽس جمال خان مندوخيل جي مشاورت کان پوءِ سپريم ڪورٽ اسلام آباد هاءِ ڪورٽ جو 16 سيپٽمبر وارو حڪم معطل ڪري ڇڏيو، ۽ اٽارني جنرل، ايڊووڪيٽ جنرل اسلام آباد سميت فریقین کي نوٽيس جاري ڪري ڪيس جي ٻڌڻي ايندڙ ڏينهن تائين ملتوي ڪئي وئي.
واضح رهي ته اسلام آباد هاءِ ڪورٽ جي چيف جسٽس سرفراز ڊوگر جي سربراهيءَ ۾ بينچ، جسٽس طارق جهانگيري کي عدالتي ڪم کان روڪڻ جو حڪم جاري ڪيو هو، جيڪو مبينا جعلي ڊگري جي درخواست تي ٻڌل هو.
سپريم ڪورٽ جي فيصلي کان اڳ، جسٽس جهانگيري سان گڏ آيل اسلام آباد هاءِ ڪورٽ جا باقي جج پنهنجي مقرر ڪيسن جي ٻڌڻي جاري رکي، جن ۾ جسٽس محسن اختر ڪياني، جسٽس بابر ستار، جسٽس سردار اعجاز اسحاق ۽ جسٽس ثمن رفعت امتياز شامل هئا.
