ڪراچي(اسٽاف رپورٽر) سنڌ هاءِ ڪورٽ اسلام آباد هاءِ ڪورٽ جي جسٽس طارق محمود جهانگيري جي ڊگري منسوخي خلاف داخل درخواست تي جامعہ ڪراچي جو فيصلو عارضي طور معطل ڪري ڇڏيو آهي.
عدالت جامعہ ڪراچي جي سينڊيڪيٽ ۽ ان جي انڪوائري ڪميٽي جي سفارش تي وڌيڪ ڪارروائي کان به روڪ لڳائي ڇڏي. جسٽس اقبال ڪلهوڙو ۽ جسٽس مظاهر علي اڪبر نقوي تي مشتمل ڊويزن بئنچ درخواست جي ٻڌڻي ڪئي.
جامعہ ڪراچي جي رجسٽرار پروفيسر عمران صديقي عدالت آڏو موقف اختيار ڪيو ته کيس تازو ئي نوٽيس مليو آهي، تنهن ڪري جواب جمع ڪرائڻ لاءِ مهلت ڏني وڃي. درخواست گذار جي وڪيل بئريسٽر صلاح الدين چيو ته جواب لاءِ وقت ڏئي سگهجي ٿو، پر ان دوران ڪراچي يونيورسٽي جو فيصلو معطل ٿيڻ گهرجي ته جيئن سندن مؤڪل کي نقصان نه ٿئي.
ٻڌڻي دوران جسٽس اقبال ڪلهوڙو ريمارڪس ڏيندي چيو ته هي معاملو هڪ شخص جي سڄي زندگي جي ڪمائي جو آهي، تنهن ڪري عدالت کي نهايت احتياط سان فيصلو ڪرڻو پوندو. جيڪڏهن 35 سالن کانپوءِ درخواست داخل ڪئي وئي آهي ته متاثر شخص کي ضرور ٻڌڻ گهرجي، بنا ٻڌڻ جي ڪيل فيصلو قانوني طور ڪمزور هوندو.
جسٽس ڪلهوڙو وڌيڪ چيو ته ممڪن آهي ته ذاتي مفاد جي بنياد تي ڪارروائي ڪئي وئي هجي، جڏهن ته “ايڪس پارٽي ججمنٽ” کي ڪڏهن به سٺو فيصلو نه سمجهيو ويندو. عدالت واضح ڪيو ته جيڪڏهن جامعہ ڪراچي درخواست گذار کي نوٽيس نه ڏنو ته فيصلو قانوني تقاضائن تي پورو نه لهندو.
رجسٽرار ڪراچي يونيورسٽي عدالت کي آگاهه ڪيو ته هو نئون مقرر ٿيو آهي، تنهن ڪري معاملي جي تفصيل کان مڪمل طور واقف نه آهي. عدالت چيو ته جيڪڏهن اوهان عدالت ۾ آيا آهيو ته جواب ڏيڻ لازمي آهي.
عدالت ڪراچي يونيورسٽي کي جواب جمع ڪرائڻ لاءِ مهلت ڏيندي وڌيڪ ٻڌڻي 20 نومبر تائين ملتوي ڪري ڇڏي.
