واشنگٽن (ويب ڊيسڪ) آمريڪي صدر ڊونلڊ ٽرمپ چيو آهي ته پاڪستان جي فيلڊ مارشل سيد عاصم منير جي طرفان جنگ بندي تي سندس تعريف ڪنهن اعزاز کان گهٽ ناهي. صدر ٽرمپ آمريڪي فوجي جنرلن سان خطاب دوران ان ڳالهه جو اظهار ڪيو.
صدر ٽرمپ ٻڌايو ته ٽي ڏينهن اڳ پاڪستان جي وزيراعظم شهباز شريف ۽ فيلڊ مارشل عاصم منير سان ملاقات ٿي، جنهن دوران عاصم منير چيو ته “توهان جنگ روڪائي لکين جانيون بچايون، جيڪڏهن جنگ ٿئي ها ته وڏو نقصان ٿئي ها”.
صدر ٽرمپ وڌيڪ چيو ته عاصم منير جي اهڙي انداز مون کي تمام گهڻو وڻيو، ۽ سندس تعريف مون لاءِ اعزاز آهي. هن دعويٰ ڪئي ته واپار جي آڇ سان هن ست جنگون ختم ڪرايون، جن مان سڀ کان اهم پاڪستان-ڀارت جنگ هئي، جيڪا ايٽمي جنگ ۾ تبديل ٿي سگهي پئي.
صدر ٽرمپ خطاب دوران شڪايت ڪئي ته باوجود ان جي جو هن غزه جنگ جو تصفيه ڪرايو ۽ ست جنگون روڪيون، کيس نوبيل انعام نه ڏنو ويو. هن چيو ته نوبيل انعام شايد اهڙي شخص کي ملي، جنهن ڪو وڏو ڪم ئي نه ڪيو هجي، جيڪو آمريڪين جي توهين هوندي.
