اسلام آباد (نمائندو خصوصي) آزاد ڪشمير ۾ جاري عوامي احتجاج جي پسمنظر ۾ وزيراعظم شهباز شريف جي هدايت تي اعليٰ سطحي حڪومتي ڪميٽي مظفرآباد پهچي وئي، جتي جوائنٽ ايڪشن ڪميٽي جي نمائندن سان باضابطه ڳالهه ٻولهه جو آغاز ڪيو ويو.
حڪومتي وفد ۾ وفاقي وزير طارق فضل چوڌري، امير مقام، احسن اقبال، سردار يوسف، راجا پرويز اشرف، قمر زمان ڪائره ۽ سردار مسعود شامل آهن. وفد جو مقصد احتجاجي مسئلن جو ترت ۽ پائيدار حل ڳولڻ آهي.
وفاقي وزير طارق فضل چوڌري پنهنجي بيان ۾ چيو ته پاڪستان جي اعليٰ سطحي وفد مظفرآباد ۾ جوائنٽ ايڪشن ڪميٽي سان باضابطه ڳالهه ٻولهه شروع ڪري ڇڏي آهي. وزيراعظم شهباز شريف مظاهرين سان نرمي ۽ بردباريءَ سان پيش اچڻ جي هدايت ڪئي آهي.
وزيراعظم طرفان عوامي جذبات جو احترام يقيني بڻائڻ، غير ضروري سختي کان پاسو ڪرڻ، ۽ متاثر خاندانن تائين ترت امداد پهچائڻ جي هدايت پڻ جاري ڪئي وئي آهي. هن ناخوشگوار واقعن تي ڳڻتي جو اظهار ڪندي شفاف جاچ جو حڪم ڏنو آهي.
وفاقي وزير احسن اقبال مظفرآباد روانگي کان اڳ ميڊيا سان ڳالهائيندي چيو ته حڪومت احتجاجي مسئلن کي قانوني ۽ پرامن طريقي سان حل ڪرڻ لاءِ پرعزم آهي. هن اميد ظاهر ڪئي ته ڳالهه ٻولهه ذريعي سڀ مسئلا مثبت ماحول ۾ حل ٿي سگهن ٿا.
پيپلز پارٽي جي اڳواڻ راجا پرويز اشرف چيو ته ڪشمير جي صورتحال تي سڀ دکدارد آهن، ۽ مسئلن جو حل صرف ڳالهه ٻولهه ۽ سياسي عمل ذريعي ممڪن آهي. هن زور ڏنو ته آزاد ڪشمير جا ماڻهو اسان جا پنهنجا آهن، ۽ جلد معاملا معمول تي آڻڻ جي ڪوشش جاري آهي.
وزيراعظم آزاد ڪشمير چودھري انوار الحق چيو ته وزيراعظم شهباز شريف جي ڪميٽي ٺاهڻ تي شڪرگذار آهي، ۽ عوامي ايڪشن ڪميٽي جا گهڻا مطالبا تسليم ڪيا ويا آهن. معطل ڳالهه ٻولهه جلد ٻيهر شروع ٿيندي.
وزيراعظم شهباز شريف اڳ ئي آزاد ڪشمير جي عوام لاءِ 23 ارب رپين جو خاص ريليف پيڪيج ڏنو آهي. هاڻي نئين مطالبن جي روشنيءَ ۾ اعليٰ سطحي ڪميٽي جي سفارشون ترت وزيراعظم آفيس موڪلي وينديون، جن تي ترت عمل ڪيو ويندو.
حڪومت جو موقف آهي ته جهموري، سياسي ۽ عوام دوست رويو اختيار ڪيو ويو آهي، ۽ مظاهرين کي به قانوني حدن ۾ رهندي احتجاج ڪرڻ گهرجي. وزيراعظم قانون لاڳو ڪندڙ ادارن کي صبر ۽ تحمل جي هدايت پڻ ڏني آهي.
