مظفرآباد (ويب ڊيسڪ) آزاد ڪشمير جي قانون ساز اسيمبلي ۾ تحريڪ عدم اعتماد ڪامياب ٿي وئي، جنهن بعد پيپلز پارٽي جي فيصل ممتاز راٺور کي نئون وزيراعظم چونڊيو ويو. هو آزاد ڪشمير جو سورھون وزيراعظم ۽ موجوده اسيمبليءَ جو چوٿون وزيراعظم بڻيو آهي. سندن حلف برداري سڀاڻي اڱاري تي ٿيڻ جو امڪان آهي.
اجلاس دوران 54 مان 44 ميمبر حاضر هئا، جن مان 36 ميمبرن فيصل ممتاز جي حق ۾ ووٽ ڏنو. تحريڪ عدم اعتماد سردار جاويد ايوب، چوڌري قاسم مجيد ۽ ٻين طرفان پيش ڪئي وئي، جنهن ۾ فيصل ممتاز کي متبادل قائدِ ايون طور نامزد ڪيو ويو.
واضح رهي ته اڳوڻي وزيراعظم چوڌري انوار الحق کي استعيفيٰ ڏيڻ جو پيغام موڪليو ويو هو، پر هن انڪار ڪيو، جنهن بعد پيپلز پارٽي تحريڪ عدم اعتماد جمع ڪرائي. صدر آصف علي زرداري گذريل مهيني انوار الحق خلاف تحريڪ جي منظوري ڏني هئي.
26 آڪٽوبر تي سنڌ هائوس اسلام آباد ۾ پيپلز پارٽي طرفان ڊنر رکيو ويو، جنهن ۾ قانون ساز اسيمبلي جا 27 ميمبر شرڪت ڪئي. ساڳي ڏينهن پي ٽي آءِ فارورڊ بلاڪ جا 10 وزير فريال تالپور سان ملاقات بعد پيپلز پارٽي ۾ شامل ٿي ويا، جنهن سان پيپلز پارٽي کي سادو اڪثريت حاصل ٿي وئي.
ان وقت انوار الحق گروپ وٽ صرف 7 ميمبر باقي آهن، جڏهن ته تحريڪ انصاف وٽ 5، مسلم ڪانفرنس ۽ جي ڪي پي پي وٽ 1،1 سيٽ آهي. تحريڪ جي ڪاميابي سان آزاد ڪشمير جي سياست ۾ نئون باب کُلي ويو آهي.
