مظفرآباد (ويب ڊيسڪ) آزاد ڪشمير جي وزيراعظم چوڌري انوار الحق خلاف اڄ بي اعتمادي رٿ تي ووٽنگ ٿيندي، جيڪا مظفرآباد ۾ شام 3 وڳي ٿيندڙ قانون ساز اسيمبلي جي اجلاس دوران منعقد ڪئي ويندي.
پيپلز پارٽي طرفان فيصل ممتاز راٺور کي وزارت عظميٰ لاءِ اميدوار نامزد ڪيو ويو آهي، ۽ دعويٰ ڪئي وئي آهي ته هن کي 35 کان وڌيڪ ميمبرن جي حمايت حاصل آهي. تحريڪ جي ڪاميابي لاءِ 27 ووٽن جي سادي اڪثريت گهربل آهي.
ذريعن موجب، مسلم ليگ (ن) به تحريڪ جي حمايت ڪندي، پر حڪومت جو حصو نه بڻجندي. مسلم ليگ ن آزاد ڪشمير جي صدر شاهه غلام قادر موجب، جماعت مضبوط اپوزيشن جو ڪردار ادا ڪندي.
تحريڪ عدم اعتماد 14 نومبر تي چودھري قاسم مجيد، سردار جاويد ايوب، ملڪ ظفر اقبال، علي شان سوني ۽ محمد رفيق نيئر طرفان جمع ڪرائي وئي هئي. وزيراعظم انوار الحق کي استعيفيٰ ڏيڻ جو پيغام ڏنو ويو هو، پر هن انڪار ڪيو، جنهن بعد پيپلز پارٽي تحريڪ جمع ڪرائي.
