مظفرآباد(ويب ڊيسڪ) آزاد ڪشمير ۾ وفاقي وزيرن ۽ عوامي ايڪشن ڪميٽي جي وچ ۾ ڳالهين جو پهريون دور ڪاميابيءَ سان مڪمل ٿيڻ بعد ماحول پرامن ٿي ويو آهي.
اڄ ڳالهين جي ٻئي مرحلي جي شروعات ٿيندي، جنهن ۾ وفاقي وزير احسن اقبال، قمر زمان ڪائره ۽ امير مقام شامل آهن. وفاقي وفد مظفرآباد ۾ موجود آهي ۽ ڳالهين جي ڪاميابيءَ لاءِ پراميد آهي.
ذريعن موجب شوڪت نواز مير ۽ ٻين جي مظفرآباد پهچڻ بعد ٻيو دور جمعي جي نماز کان پوءِ شروع ٿيندو. حڪومت جي اعليٰ سطحي ڪميٽي امن جي قيام لاءِ سنجيده آهي.
وفاقي وزير احسن اقبال چيو ته اميد آهي ته مسئلو پرامن طريقي سان حل ٿي ويندو. هن چيو ته آزاد ڪشمير جا عوام محب وطن آهن، ۽ ملڪ جي معاشي بهتري لاءِ امن ضروري آهي، ڇو ته دشمن ملڪ عدم استحڪام مان فائدو وٺڻ ۾ دير نه ڪندو.
وفاقي وزير امير مقام جو چوڻ هو ته ڪيترن ئي معاملن تي اتفاق راءِ موجود آهي، ۽ باهمي سمجهداري سان اصل مسئلا حل ٿيڻ گهرجن.
قمر زمان ڪائره چيو ته وزيراعظم شهباز شريف پاڻ هن مسئلي تي نظر رکي رهيو آهي، ۽ اميد آهي ته ڳالهين ذريعي حل نڪري ايندو. هن چيو ته حڪومت پنهنجن شهرين جي جائز مطالبن سان گڏ آهي، ۽ ڪنهن کي به اڪيلو نه ڇڏينداسين.
