ڪراچي(ويب ڊيسڪ) پاڪستان پيپلز پارٽي جي چيئرمين بلاول ڀٽو زرداري اسرائيل طرفان گلوبل صمود فلوٽلا مان گرفتار ڪيل اڳوڻي سينيٽر مشتاق احمد خان سميت سڀني ماڻهن جي فوري آزادي جو مطالبو ڪيو آهي۔
بلاول ڀٽو زرداري فلوٽلا کي روڪڻ تي ردعمل ڏيندي چيو ته کاڌو ۽ دوا ڪو به خطرو نه آهي، اسرائيل طرفان ڊاڪٽرن ۽ رضاڪارن کي گرفتار ڪري انسانيت تي کليل حملو ڪيو ويو آهي۔
هن چيو ته پاڪستاني اڳوڻي سينيٽر مشتاق احمد خان کي حراست ۾ وٺڻ بين الاقوامي قانونن جي ڀڃڪڙي آهي، ۽ اسرائيلي قدم قابل مذمت آهي۔
بلاول ڀٽو غزه لاءِ انساني راهداري کولڻ ۽ فلسطين لاءِ انصاف جو مطالبو پڻ ڪيو۔
ياد رهي ته اسرائيلي فوج غزه ڏانهن امدادي سامان کڻي ويندڙ گلوبل صمود فلوٽلا جي 450 رضاڪارن کي گرفتار ڪري رکيو آهي، جن ۾ مشتاق احمد خان، سوئيڊن جي ماحولياتي ڪارڪن گريتا ٿنبرگ ۽ نيلسن منڊيلا جو پوٽو نڪوسي زويوڪاليان به شامل هئا۔
