راولپنڊي (ويب ڊيسڪ) – فيلڊ مارشل سيد عاصم منير چيو آهي ته جيڪڏهن ڀارت ڪنهن “نئين معمول” (New Normal) جي ڳالهه ڪندو ته پاڪستان ان جو جواب نئين ۽ مؤثر عسڪري ردعمل سان ڏيندو.
جي ايڇ ڪيو راولپنڊي ۾ 272هين ڪور ڪمانڊرز ڪانفرنس جي صدارت ڪندي، فيلڊ مارشل عاصم منير چيو ته پاڪ فوج دشمن جي هر قسم جي جارحيت جو منھ توڙ جواب ڏيڻ لاءِ مڪمل تيار آهي.
اجلاس جي شروعات ڀارتي سرپرستي هيٺ ٿيل دهشتگرد حملي ۾ شهيد ٿيل جوانن جي ايصالِ ثواب لاءِ فاتحه خواني سان ڪئي وئي. فيلڊ مارشل دهشتگردي خلاف جنگ ۾ پاڪ فوج جي عزم، بهادري ۽ قربانين کي ساراهيو.
هن تازي ٻوڏ دوران سول انتظاميه سان گڏجي ڪيل ريسڪيو ۽ رليف آپريشنز ۾ فوج جي ڪردار کي به خراجِ تحسين پيش ڪيو.
فورم ملڪ ۾ جاري دهشتگردي مخالف آپريشنز، نون خطرن ۽ آپريشنل تيارين جو تفصيلي جائزو ورتو. اجلاس ۾ واضح ڪيو ويو ته دهشتگردي، ڏوهن ۽ سياسي سرپرستي جي گٺ جوڙ کي ڪنهن به صورت ۾ برداشت نه ڪيو ويندو.
فورم ڀارتي قيادت جي اشتعال انگيز بيانن تي ڳڻتي ظاهر ڪندي چيو ته ڀارت جي جنگي جنون خطي جي امن لاءِ خطرو آهي، جنهن جو مقصد صرف اندروني سياسي فائدو حاصل ڪرڻ آهي.
شرڪت ڪندڙن اتفاق ڪيو ته ڀارتي سرپرستي هيٺ سرگرم دهشتگرد گروهن جهڙوڪ فتنۃ الخوارج ۽ فتنۃ الھندستان کي ختم ڪرڻ لاءِ جامع مہم جاري رهندي.
اجلاس ۾ پاڪستان ۽ سعودي عرب جي وچ ۾ ٿيل تاريخي دفاعي معاهدي کي ڀليڪار چيو ويو، جيڪو ٻنهي ملڪن جي لاڳاپن کي وڌيڪ مضبوط بڻائيندو.
فورم والاريل ڪشمير جي عوام جي حقِ خوداراديت جي جدوجهد جي حمايت جو اعاده ڪيو، ۽ گڏوگڏ فلسطيني عوام جي حق ۾ غير متزلزل حمايت جو اظهار ڪندي، غزه ۾ جنگ بندي ۽ انساني امداد جي فراهمي تي زور ڏنو.
