مظفرآباد(ويب ڊيسڪ) وزيراعظم شهباز شريف چيو آهي ته پاڪستان ڪشميرين سان گڏ بيٺو آهي ۽ ڀارت جنهن زبان ۾ ڳالهائيندو، پاڪستان ساڳي زبان ۾ جواب ڏيندو. مظفرآباد ۾ ڪشمير ڏهاڙي جي موقعي تي آزاد جمون و ڪشمير قانون ساز اسيمبلي جي خصوصي اجلاس کي خطاب ڪندي وزيراعظم چيو ته فيلڊ مارشل جي قيادت ۾ ڀارت کي اهڙي تاريخي شڪست ڏني وئي، جيڪا هو نسلن تائين ياد رکندو.
وزيراعظم شهباز شريف چيو ته هو ڪشميري عوام سان مڪمل همدردي ۽ يڪجهتي جي اظهار لاءِ آزاد ڪشمير آيا آهن. پاڪستان هر سطح تي ڪشميرين جي سياسي، سفارتي ۽ اخلاقي حمايت جاري رکندو. هن قائداعظم محمد علي جناح جي فرمان جو حوالو ڏيندي چيو ته “ڪشمير پاڪستان جي شه رڳ آهي” ۽ ڪشميري عوام روزانو دنيا کي پنهنجي جدوجهد جي سچائي ڏيکاري رهيا آهن.
وزيراعظم جو چوڻ هو ته آزاد ڪشمير ۾ ڪنهن به جماعت جي حڪومت هجي، وفاقي حڪومت جو فرض آهي ته تعاون ڪري ۽ ان سلسلي ۾ ڪا به ڪمي نه ايندي. هن چيو ته ڪشميري عوام جون قربانيون رائيگان نه وينديون، تحريڪِ آزاديءَ جي شهيدن کي قوم سلام پيش ڪري ٿي ۽ ڪشمير جي آزاديءَ تي ڪڏهن به سمجهوتو نه ڪيو ويندو.
شهباز شريف وڌيڪ چيو ته ڀارت طرفان دهشتگردي ۽ پراڪسي سرگرميون جاري آهن، پر ڀارت جنهن محاذ تي به جارحيت ڪندو، ان کي ساڳي محاذ تي يادگار جواب ڏنو ويندو. هن چيو ته معرڪه حق ۾ ڀارت جو غرور مٽيءَ ۾ ملي ويو ۽ سفارتي سطح تي به ڀارت ناڪام ٿي چڪو آهي.
وزيراعظم وضاحت ڪئي ته معرڪه حق ۾ پاڪستان جي ڪاميابي اصل ۾ ڪشميري عوام جي به فتح آهي، جنهن سان ڪشمير ڪاز ٻيهر عالمي سطح تي اجاگر ٿيو آهي. هن زور ڏنو ته ڀارت لاءِ واحد رستو اهو آهي ته هو ڪشميرين کي سندن حقِ خوداراديت ڏئي ۽ خطي ۾ پائيدار امن قائم ڪري.
شهباز شريف چيو ته پاڪستان امن جو خواهشمند آهي، پر امن صرف برابري ۽ انصاف جي بنياد تي قائم ٿي سگهي ٿو. هن قومي اتحاد ۽ اتفاق تي زور ڏيندي چيو ته دشمن جا عزائم ناڪام بڻائڻ لازمي آهي. وزيراعظم فلسطين ۽ ڪشمير بابت پاڪستان جي اصولي موقف کي به ورجايو ۽ غزه ۾ امن لاءِ پاڪستان جي ڪردار جو ذڪر ڪيو.
