راولپنڊي (ويب ڊيسڪ) پاڪ-افغان سرحد تي افغانستان طرفان بلااشتعال فائرنگ جي واقعي تي پاڪ فوج طرفان سخت ۽ مؤثر جواب ڏنو ويو، جنهن جي نتيجي ۾ ڪيترائي افغان فوجي ۽ خوارج مارجي ويا، جڏهن ته افغان طالبان پنهنجون لاشون ڇڏي فرار ٿي ويا.
سڪيورٽي ذريعن موجب افغان فورسز طرفان انگور اڊا، باجوڙ، ڪرّم، دير، چترال ۽ بلوچستان جي بارام چاهه علائقن تي بنا ڪنهن جواز جي فائرنگ ڪئي وئي. ان فائرنگ جو مقصد خوارج جي گروپن کي سرحد پار ڪرائڻ هو.
پاڪ فوج جي چوڪس ۽ مستعد پوسٽن طرفان فوري ۽ شديد ردعمل ڏنو ويو، جنهن دوران ڪيترين ئي افغان چيڪ پوسٽن کي مؤثر طريقي سان نشانو بڻايو ويو. نتيجي طور، افغانستان جون ڪيترائي سرحدي پوسٽون تباهه ٿي ويون ۽ درجنين افغان فوجي ۽ خوارج مارجي ويا.
ذريعن موجب طالبان پنهنجون پوسٽون ڇڏي فرار ٿي ويا، جڏهن ته لاشون ميدان تي بکھري پيل آهن. افغان جارحيت ان وقت ٿي رهي آهي، جڏهن افغان پرڏيهي وزير ڀارت جي دوري تي آهي، جنهن سان خطي جي صورتحال وڌيڪ ڳڻتي جوڳي بڻجي وئي آهي.
پاڪستاني فورسز طرفان داعش ۽ خوارج جي ٺڪاڻن کي فضائي ذريعن، ڊرونز، آرٽلري، ٽينڪن ۽ ٻين جديد هٿيارن سان نشانو بڻايو ويو. ڪارروائي دوران انهن هيڊڪوارٽرن کي به نشانو بڻايو ويو، جتي داعش ۽ خوارج کي پناه ڏني ويندي هئي.
سڪيورٽي ذريعن جو چوڻ آهي ته پاڪ فوج جي بروقت ۽ مؤثر ڪارروائي سان دشمن کي وڏو نقصان پهتو آهي، جڏهن ته افغان فورسز ڪيترن ئي علائقن مان پسپائي اختيار ڪري چڪيون آهن.
