لاهور(ويب ڊيسڪ) سينيئر قانوندان ۽ اڳوڻي گورنر پنجاب سردار لطيف کوسا چيو آهي ته پاڪستان طرفان افغانستان سان محاذ کولڻ افسوسناڪ قدم آهي، ڪيترائي افغان پاڪستان جي سرزمين تي پلجي وڏا ٿيا ۽ هاڻ انهن کي ملڪ مان ڪڍيو پيو وڃي.
لاهور هاءِ ڪورٽ ۾ ميڊيا سان ڳالهائيندي لطيف کوسا چيو ته، “ڀارت سان ڳالهه ٻولهه لاءِ تيار آهيو، پر افغانستان سان ڳالهائڻ لاءِ راضي ناهيو، جيڪو افسوس جوڳي ڳالهه آهي.”
تحريڪ لبيڪ پاڪستان (ٽي ايل پي) جي احتجاج خلاف آپريشن تي تبصرو ڪندي هن مريدڪي واقعي تي افسوس جو اظهار ڪيو ۽ چيو ته، “26 نومبر تي اسان سان به ساڳي ورتاءُ ڪيو ويو، اسان ان واقعي جي سخت لفظن ۾ مذمت ڪريون ٿا.” هن سانحي ماڊل ٽائون جو حوالو ڏيندي چيو ته، “14 معصوم ماڻهن کي شهيد ڪيو ويو، ن ليگ سپريم ڪورٽ جي ديوارن کي ٽپي وئي، پر انهن خلاف ڪا ڪارروائي نه ٿي.”
لطيف کوسا وڌيڪ چيو ته 26هين آئيني ترميم کان پوءِ ملڪ ۾ آئيني اصولن کي دفن ڪيو ويو، جڏهن ته پيڪا قانون ذريعي ميڊيا جو آواز دٻايو ويو. هن چيو ته پاڪستان ۾ احتجاج جو حق ئي ختم ڪيو ويو آهي.
سرفراز چيمه پاران حمزه شهباز کان بطور وزيراعليٰ حلف نه وٺڻ بابت هن چيو ته اهو قدم درست هو، جڏهن ته فيصل ڪريم ڪنڊي طرفان ڪي پي جي وزيراعليٰ سهيل آفريدي کان حلف نه وٺڻ کي غيرقانوني قرار ڏنو.
سردار لطيف کوسا جي بيان سان ملڪ جي موجوده سياسي ۽ آئيني صورتحال تي نئين بحث ڇڙي وئي آهي.
