رياض (نمائندو خصوصي) – پاڪ-افغان سرحد تي افغان فورسز جي بلااشتعال فائرنگ ۽ پاڪستان جي سخت جواب کان پوءِ سعودي عرب طرفان سرحدي ڇڪتاڻ تي گہري تشويش جو اظهار ڪيو ويو آهي. سعودي وزارتِ خارجہ ٻنهي ملڪن تي زور ڏنو آهي ته هو تحمل، حڪمت ۽ ڳالهه ٻولهه جي ذريعي مسئلي جو حل ڳولين.
سعودي وزارتِ خارجہ طرفان جاري بيان ۾ چيو ويو آهي ته اسلامي جمهوريه پاڪستان ۽ افغانستان جي وچ ۾ سرحدي علائقن ۾ حاليه ڇڪتاڻ ۽ جهيڙن تي سعودي عرب کي ڳڻتي آهي.
بيان ۾ وڌيڪ چيو ويو آهي ته ٻنهي ملڪن کي گهرجي ته هو ڇڪتاڻ ۾ واڌ کان پاسو ڪن ۽ امن، استحڪام ۽ خوشحالي لاءِ مذاڪرات ۽ بردباري جو مظاهرو ڪن.
سعودي حڪومت واضح ڪيو آهي ته هو اهڙين علاقائي ۽ عالمي ڪوششن جي حمايت جاري رکندو، جيڪي خطي ۾ امن ۽ ترقي جو سبب بڻجن، خاص طور تي پاڪستاني ۽ افغان عوام جي بهتر مستقبل لاءِ.
سعودي وزارتِ خارجہ موجب، سعودي عرب خطي ۾ امن ۽ سلامتي کي يقيني بڻائڻ جو خواهشمند آهي ۽ چاهي ٿو ته برادر قومون پاڪستان ۽ افغانستان جي وچ ۾ لاڳاپن ۾ بهتري اچي، جيئن ٻئي قومون خوشحالي جي راهه تي گامزن ٿي سگهن.
