اسلام آباد (ويب ڊيسڪ) وزيراعظم جي صدارت هيٺ ٿيل اجلاس ۾ وفاقي ڪابينا تحريڪ لبيڪ پاڪستان (ٽي ايل پي) تي پابندي جي منظوري ڏئي ڇڏي. اجلاس دوران پنجاب حڪومت پاران ٽي ايل پي تي پابندي جي سفارش بابت ڪابينا ميمبرن کي آگاهه ڪيو ويو.
وفاقي ڪابينا آئين جي آرٽيڪل 17 تحت پابندي جي منظوري ڏني، جڏهن ته وزارت داخلا کي وڌيڪ قانوني ڪارروائي لاءِ هدايتون جاري ڪيون ويون. اجلاس ۾ وزارت داخلا طرفان ٽي ايل پي بابت تفصيلي بريفنگ پڻ پيش ڪئي وئي.
وزيراعظم جي صدارت هيٺ ٿيل اجلاس ۾ ملڪ جي موجوده سياسي ۽ معاشي صورتحال تي غور ويچار ڪيو ويو، جڏهن ته افغانستان سان ٿيل تازي جنگبندي معاهدي کانپوءِ جي حالتن تي به بحث ڪيو ويو.
ان کان علاوه، وزير دفاع افغانستان سان ٿيل معاهدي بابت بريفنگ ڏني، جڏهن ته اجلاس دوران اقتصادي رابطا ڪميٽي (اي سي سي) ۽ قانون سازي بابت ڪابينا ڪميٽي جي فيصلن جي توثيق پڻ ڪئي وئي.
