اسلام آباد (ويب ڊيسڪ) وزيراعظم شهباز شريف جي صدارت هيٺ وفاقي ڪابينا جي اهم اجلاس ۾ 27هين آئيني ترميم جي مسودي جي منظوري ڏني وئي، جنهن سان ملڪ جي آئيني ڍانچي ۾ اهم تبديليون متعارف ڪرايون وينديون.
وزيراعظم شهباز شريف آذربائيجان جي شهر باڪو مان وڊيو لنڪ ذريعي اجلاس جي صدارت ڪئي. اجلاس دوران وفاقي وزير قانون اعظم نذير تارڙ ترميم بابت تفصيلي بريفنگ ڏني. ترميم جي منظوري کان پوءِ وزير قانون ميڊيا کي ان جا اهم خدوخال پڻ ٻڌايا.
ترميم جي اهم نڪات ۾ شامل آهن:
– آئيني عدالت جو قيام
– ججن جي ٽرانسفر جو نئون نظام
– آرٽيڪل 243 ۾ تبديليون
– نئين فوجي يونٽ “آرمي راڪيٽ فورس” (ARFC) جو قيام
– چيئرمين جوائنٽ آف اسٽاف جو عهدو ختم ڪري “ڪمانڊر آف ڊي فنس فورسز” جو نئون عهدو قائم ڪرڻ
وزيراعظم شهباز شريف چيو ته وفاقي ۽ صوبائي لاڳاپن جي مضبوطي ۽ ملڪ جي وسيع مفاد ۾ سڀني اتحادي جماعتن سان مشاورت ڪئي وئي. هن ٻڌايو ته ترميم بابت اڳواڻ نواز شريف، صدر آصف علي زرداري، بلاول ڀٽو زرداري، خالد مقبول صديقي، عبدالعليم خان، خالد حسين مگسي، چودھري سالڪ حسين، ايمل ولي خان، اعجاز الحق ۽ ٻين سياسي اڳواڻن سان صلاح مشورا ڪيا ويا.
وزيراعظم ترميم جي تياري ۾ قانون ۽ انصاف واري وزارت، اٽارني جنرل ۽ سندن ٽيم جي محنت جي واکاڻ ڪئي. هن چيو ته ملڪ جي سياسي ۽ معاشي استحڪام سان ترقيءَ جي نئين راهه هموار ٿي آهي، ۽ سڀني کي گڏجي ڪم ڪرڻو پوندو.
ذريعن موجب، 27هين ترميم تحت آئين جي مختلف شقن ۾ مجموعي طور 46 تبديليون آڻڻ جو ارادو آهي. ترميم جي منظوري کان پوءِ ان کي سينيٽ ۾ پيش ڪيو ويندو، جتي قومي اسيمبلي ۽ سينيٽ جي گڏيل ڪميٽي ان تي غور ڪندي ۽ سفارشون پيش ڪندي.
