سعودي عرب دنيا جو پهريون “اسڪاءِ اسٽيڊيم” تعمير ڪرڻ جو فيصلو ڪري ورتو آهي، جيڪو نيوم منصوبي جو حصو هوندو. عالمي ميڊيا جي رپورٽن موجب، هي اسٽيڊيم زمين کان 350 ميٽر (تقريباً 1150 فوٽ) جي اوچائيءَ تي هوا ۾ معلق هوندو، ۽ ان جو افتتاح 2032ع ۾ متوقع آهي. امڪان آهي ته 2034ع جي فيفا ورلڊ ڪپ جا ڪجهه ميچز به هتي کيڏيا ويندا.
اسٽيڊيم ۾ 46 هزار تماشائين جي ويهڻ جي گنجائش هوندي، ۽ ان کي مڪمل طور تي قابل تجديد توانائي ذريعن جهڙوڪ سج، هوا ۽ پاڻي مان حاصل ٿيندڙ بجلي تي هلائڻ لاءِ ڊزائين ڪيو پيو وڃي. سوشل ميڊيا تي گردش ڪندڙ رپورٽن موجب، هي اسٽيڊيم رڳو راندين لاءِ نه پر هڪ ثقافتي، تفريحي ۽ سماجي مرڪز طور به ڪم ڪندو.
رپورٽن ۾ اهو به ٻڌايو ويو آهي ته اسٽيڊيم ۾ مردن ۽ عورتن لاءِ پيشه ور فٽبال ڪلبز به موجود هوندا، جڏهن ته سڄي سال دوران مختلف عالمي تقريبون پڻ منعقد ڪيون وينديون. هي منصوبو سعودي عرب جي جديد تعميراتي سوچ، ماحول دوست ترقي، ۽ عالمي راندين جي ميدان ۾ اڳڀرائيءَ جي عڪاسي ڪري ٿو، جيڪو سعودي وژن 2030ع جو اهم حصو آهي.
