پشاور (ويب ڊيسڪ): فيلڊ مارشل عاصم منير چيو آهي ته پاڪستان افغانستان سميت سڀني پاڙيسري ملڪن سان امن جو خواهشمند آهي، پر افغان سرزمين تان پاڪستان خلاف سرحد پار دهشتگردي ڪنهن به صورت ۾ برداشت نه ڪئي ويندي.
آءِ ايس پي آر موجب، فيلڊ مارشل عاصم منير پشاور جو دورو ڪيو، جتي هن قبائلي عمائدين سان جرگي جي صورت ۾ ملاقات ڪئي. ان موقعي تي آرمي چيف کي هيڊڪوارٽر 11 ڪور ۾ سيڪيورٽي صورتحال، آپريشنل تيارين، پاڪ-افغان سرحد تي امن ۽ استحڪام، ۽ دهشتگردي خلاف جاري قدمن بابت تفصيلي بريفنگ ڏني وئي.
فيلڊ مارشل عاصم منير قبائلي علائقن جي عوام جي قربانين کي ڀيٽا پيش ڪندي چيو ته دهشتگردي خلاف جنگ ۾ خيبرپختونخوا جي عوام جو ڪردار ساراهه جوڳو آهي. هن پاڪ-افغان تڪرار جي دوران قبائلي عوام جي سيڪيورٽي فورسز سان غير مشروط سهڪار کي به واکاڻيو.
آءِ ايس پي آر موجب، قبائلي عمائدين به دهشتگردي ۽ افغان طالبان خلاف پاڪ فوج جي مڪمل حمايت جو اظهار ڪيو.
فيلڊ مارشل جرگي کي خطاب ڪندي چيو ته پاڪستان امن جو داعي آهي، پر پنهنجي سرزمين جي حفاظت لاءِ هر قدم کنيو ويندو. افغان سرزمين تان ٿيندڙ دهشتگردي کي روڪڻ لاءِ سخت موقف اختيار ڪيو ويندو.
