اسلام آباد (نمائندو خاص) سينيٽر فيصل واوڊا چيو آهي ته 27هين آئيني ترميم جي منظوري لاءِ نمبرز جو ڪو مسئلو ناهي، نمبرز پورا آهن. هن مولانا فضل الرحمان سان ملاقات دوران ترميم بابت مشاورت ڪئي ۽ چيو ته مولانا صاحب ترميمي معاملن کي سمجهي اڳتي وڌندا.
سينيٽر واوڊا جي ملاقات مولانا فضل الرحمان جي رهائشگاه تي ٿي، جنهن ۾ جميعت علماءِ اسلام جي ترجمان اسلم غوري به شريڪ هئا. ملاقات دوران ملڪ جي سياسي صورتحال تي به ڳالهيون ٿيون.
ميڊيا سان ڳالهائيندي فيصل واوڊا چيو ته عوام 27هين ترميم لاءِ بيچين آهي، جڏهن ته هو اڳ ئي 28هين ترميم جي تياري ڪري رهيو آهي. هن واضح ڪيو ته ترميمون ملڪ جي ترقي سان گڏ اينديون رهنديون.
فيصل واوڊا موجب، 27هين ترميم ۾ ٽرانسفر، پوسٽنگ ۽ عمر بابت تبديليون شامل آهن، جڏهن ته 18هين ترميم کي رول بئڪ ڪرڻ جو ارادو ناهي. حڪومت صوبن کي 2000 ارب رپيا ڏئي رهي آهي، ۽ جيڪڏهن اتفاق راءِ سان تبديلي اچي ته ان ۾ ڪو حرج ناهي.
هن آرٽيڪل 243 جو حوالو ڏيندي چيو ته صرف فوجي جنگ نه، پر اقتصادي، سائبر ۽ معاشي جنگ به شامل آهي، ۽ جيڪڏهن ٽنهي فوجن کي توانائي ڏيڻ جي ضرورت پئي ته ضرور ڏني ويندي.
سينيٽر واوڊا جو چوڻ هو ته 27هين ترميم آساني سان منظور ٿيندي نظر اچي رهي آهي، ۽ جيڪڏهن ڪو ابھام ٿيو ته “فلائٽ آن بورڊ” آهي. هن چيو ته پيپلز پارٽي نظام جي ضامن آهي ۽ ان کي رول بئڪ ٿيڻ نه ڏيندي.
پي ٽي آءِ بابت سوال تي هن چيو ته انهن کي اعتماد ۾ وٺڻ گهرجي، پر جيڪڏهن نه اچن ته اهو انهن جو فيصلو آهي. ٽي ايل پي بابت هن چيو ته سندن لاڳاپا سٺا رهيا آهن، پر هڪ مسئلي سبب پارٽي ڪالعدم ٿي، ۽ جيڪڏهن سخت ردعمل ڏنو ويو ته نتيجا به سامهون ايندا.
