اسلام آباد (ويب ڊيسڪ) پاڪستان تحريڪ انصاف جا ٻه سينيٽرز، سيف الله ابڙو (سنڌ) ۽ فيصل سليم الرحمان (خيبرپختونخوا)، پارٽي سان رابطي کان ٻاهر ٿي ويا آهن، جنهن تي قيادت پاران ڳڻتي جو اظهار ڪيو ويو آهي.
پارٽي ذريعن موجب، سيف الله ابڙو باني جي هدايت باوجود قائمہ ڪميٽين تان استعيفيٰ نه ڏني، جڏهن ته فيصل سليم الرحمان 26هين آئيني ترميم جي وقت به پارٽي سان رابطي ۾ نه رهيو.
اهو ان وقت سامهون آيو آهي جڏهن پارليامينٽ ۾ 27هين آئيني ترميم تي ووٽنگ جو ماحول تيز ٿي رهيو آهي، ۽ پارٽي لاءِ هر ووٽ اهميت رکي ٿو. پي ٽي آءِ قيادت پاران ٻنهي سينيٽرز سان رابطو ڪرڻ جي ڪوششون جاري آهن، پر تاحال ڪاميابي نه ملي آهي.
پارٽي جي اندروني حلقن موجب، ان صورتحال تي خدشا وڌي رهيا آهن ته آيا اهي سينيٽرز پارٽي پاليسي کان انحراف ته نه ڪري رهيا آهن. سياسي تجزيه نگارن جو چوڻ آهي ته اهڙيون حرڪتون پارلياماني حڪمت عملي تي اثرانداز ٿي سگهن ٿيون.
