ڪراچي (ويب ڊيسڪ) سنڌ هاءِ ڪورٽ ۾ ڪريڊٽ ڪارڊ ٺاهيندڙ عورت سان جنسي زيادتي ۽ نازيبا وڊيوز وائرل ٿيڻ خلاف درخواست تي ٻڌڻي ٿي، جتي عدالت سوشل ميڊيا تان وڊيوز ۽ تصويرون فوري طور هٽائڻ جو حڪم ڏنو ۽ متاثر عورت کي تحفظ فراهم ڪرڻ جي هدايت ڪئي.
درخواستگذار جي وڪيل قمر عباس ايڊووڪيٽ عدالت آڏو موقف رکيو ته مفرور ملزم زونيب نه رڳو گرفتار نٿو ٿئي، پر متاثر عورت کي مسلسل هراسان ڪري رهيو آهي. پوليس جي ناڪامي تي عدالت ناراضگي جو اظهار ڪيو.
ايس پي انويسٽيگيشن عثمان سدوزئي عدالت ۾ پيش ٿيو، جتي پراسيڪيوٽر ٻڌايو ته ايس پي ماجدہ هاليپوتا ۽ سب انسپيڪٽر ريحان جو تبادلو ٿي چڪو آهي. ايس پي انويسٽيگيشن عدالت کان گرفتاري لاءِ مهلت گهري.
استغاثي موجب، ملزمان متاثر عورت کي ٽيپو سلطان واري علائقي ۾ بلائي زيادتي جو نشانو بڻايو، جنهن بعد نازيبا مواد سوشل ميڊيا تي وائرل ڪيو ويو.
عدالت واضح هدايت ڏني ته:
- نازيبا وڊيوز ۽ تصويرون فوري طور بلاڪ ڪري هٽايون وڃن
- متاثر عورت کي قانوني تحفظ فراهم ڪيو وڃي
- مفرور ملزم جي جلد گرفتاري يقيني بڻائي وڃي.
