ڪراچي(ويب ڊيسڪ) ناليواري اداڪاره ۽ ميزبان مشي خان سوشل ميڊيا تي ويٺل ڪيترن ئي صارفين جي ذهنيت تي سخت تنقيد ڪندي کين “گندي سوچ” رکندڙ قرار ڏنو آهي۔
گذريل ڏينهن مشي خان هڪ وڊيو پوسٽ ڪئي هئي جنهن ۾ هن اڳوڻي وزيراعظم عمران خان جي صحت بابت گردش ڪندڙ خبرن تي سرڪاري سطح تي وضاحت ڏيڻ جي اپيل ڪئي هئي۔
ان وڊيو کان پوءِ سوشل ميڊيا صارفين طرفان مشي خان تي الزام لڳايو ويو ته هوءَ ڀارتي ۽ افغان ميڊيا جي بي بنياد افواهن کي اڳتي وڌائي رهي آهي۔
جوابي ردعمل ۾ مشي خان چيو ته عمران خان جي صحت بابت وڊيو ٺاهڻ تي منهنجي خلاف نازيبا زبان استعمال ڪئي وئي، جڏهن ته ماڻهن کي سوشل ميڊيا تي انسانيت جو مظاهرو ڪرڻ گهرجي۔ هن چيو ته معتبر اڪائونٽن مان منهنجي خلاف گھٽيا ڳالهيون ڪيون ويون، جيڪي انتهائي افسوسناڪ آهن۔
مشي خان ٻڌايو ته جڏهن هن سوشل ميڊيا کوليو ته خبرون گردش ڪري رهيون هيون ته عمران خان دنيا ۾ نه رهيا، ۽ کيس خبر نه هئي ته اها ڪوڙي پروپيگنڊا آهي۔ جذباتي حالت ۾ هن وڊيو پوسٽ ڪئي۔
مشي خان جو چوڻ هو ته ان کان پوءِ منهنجي خلاف انتهائي توهين آميز زبان استعمال ڪئي وئي ۽ چيو ويو ته مان اوور ايڪٽنگ ڪري رهي آهيان۔ ماڻهن کي لکڻ کان اڳ سوچڻ گهرجي، ڇو ته ڪنهن جا احساس سچا به ٿي سگهن ٿا۔ هن زور ڏنو ته “مون ڪا ايڪٽنگ نه ڪئي هئي۔”
