اسلام آباد (ويب ڊيسڪ) صدر مملڪت آصف علي زرداري چيو آهي ته پاڪستان کي درپيش چيلينجز سان منهن ڏيڻ لاءِ باخبر قيادت، قومي يڪجهتي ۽ مربوط پاليسي سازي لازمي آهي.
آءِ ايس پي آر موجب صدر آصف زرداري نيشنل ڊيفنس يونيورسٽي اسلام آباد جو دورو ڪيو ۽ 27هين نيشنل سيڪيورٽي ورڪشاپ ۾ شرڪت ڪندڙن کي مبارڪون ڏنيون.
ورڪشاپ ۾ پارليامينٽ جي ميمبرن، سينيئر سول ۽ ملٽري آفيسرن، تعليمي ادارن ۽ سول سوسائٽي جا نمائندا شامل هئا. ورڪشاپ جو مقصد قومي طاقت جي مختلف عنصرن جي باهمي تعلق ۽ جامع قومي سلامتي جي فريم ورڪ بابت شرڪت ڪندڙن جي فڪر کي وڌيڪ گہرو ڪرڻ هو.
صدر زرداري ورڪشاپ ڪاميابي سان مڪمل ڪرڻ تي شرڪت ڪندڙن جي ڪوششن کي ساراهيو ۽ قومي سلامتي جي شعور کي مضبوط ڪرڻ لاءِ انهن جي ڪردار کي اهم قرار ڏنو.
پڄاڻي جي تقريب ۾ صدر مملڪت گريجوئيٽ شرڪت ڪندڙن ۾ سندون پڻ ورهايون.
آءِ ايس پي آر موجب نيشنل سيڪيورٽي ورڪشاپ ملڪ ۾ قومي سطح تي ادارا مضبوط ڪرڻ ۽ قومي سلامتي لاءِ گڏيل حڪمت عملي کي اڳتي وڌائڻ جو اهم پليٽ فارم آهي.
