اسانجو فوجي سربراهه دشمن کي چڻا چٻائي ڇڏيندو، ڌرتي ماءُ لاءِ جان به قربان ڪنداسين: صدر
ڳڙهي خدابخش (ويب ڊيسڪ) گڙهي خدا بخش ۾ شهيد بينظير ڀٽو جي 18هين ورسي جي موقعي تي جلسي کي خطاب ڪندي صدر آصف علي زرداري چيو ته جڏهن به ڌرتي ماءُ کي ضرورت پئي ته جان قربان ڪنداسين. هن چيو ته پاڪستان قيامت تائين قائم رهندو، اسان اهڙو فوجي سربراهه مقرر ڪيو جنهن ڀارت کي منهن ٽوڙ جواب ڏنو ۽ نريندر مودي کي خبر پئجي وئي ته جنگ ڪا راند نه آهي، پاڪستاني پنهنجو دفاع ڪرڻ ڄاڻن ٿا.
صدر زرداري چيو ته پيپلزپارٽي ۽ ڀٽو جا وارث هتي موجود آهن، اسان پاڻ به وطن بچائڻ لاءِ تيار آهيون. هن وڌيڪ چيو ته “روٽي هوندي يا نه هوندي، پر جيڪڏهن وطن تي حملو ٿيو ته اسان گوليون هلائينداسين.” هن نريندر مودي کي مخاطب ڪندي چيو ته “چار ڏينهن تائين تنهنجي ٽنگون بيهڻ جي قابل نه رهيون.”
صدر ٻڌايو ته سندس ملٽري سيڪريٽري جنگ جي شروعات بابت اطلاع ڏنو ۽ چيو ته بنڪر ۾ هليو وڃو، پر هن جواب ڏنو ته جيڪڏهن شهادت لکيل آهي ته اها هتي ئي ايندي. زرداري چيو ته جيلن ۾ به پاڻ مسئلن جو مقابلو ڪيو، پيپلزپارٽي دشمنن لاءِ اڪيلي ئي ڪافي آهي، ۽ جتي شهيد بينظير ڀٽو چيو هو، اتي ئي جهنڊو لڳايو ويو.
هن وڌيڪ چيو ته پاڪستان ڪنهن ملڪ سان جنگ ڪرڻ نٿو چاهي، پر جيڪڏهن ڪنهن به ملڪ اسان جي ڳچيءَ ۾ هٿ وڌو ته ڀارت جيان ان کي به سخت جواب ڏنو ويندو. صدر زرداري موجب اسان وٽ اهڙو فوجي سربراهه آهي جيڪو دشمن کي “چڻا چٻائڻ” تي مجبور ڪري ڇڏيندو.
