اسلام آباد(ويب ڊيسڪ) صدر آصف علي زرداري چيو آهي ته ڀارت جي شرڪت نه ڪرڻ سبب سارڪ جو عمل گذريل 11 سالن کان جمود جو شڪار آهي، جيڪو مؤثر علاقائي تعاون ۾ وڏي رڪاوٽ بڻيل آهي. سارڪ چارٽر ڊي جي 40هين سالگرهه جي موقعي تي جاري ڪيل پيغام ۾ صدر ڏکڻ ايشيا جي ملڪن ۽ عوام کي مبارڪباد پيش ڪئي.
صدر زرداري چيو ته اسلام آباد چوٿي ۽ ٻارهين سارڪ سربراهي اجلاس جي ميزباني ڪئي، پر 2016ع ۾ ٿيندڙ اوڻيهين اجلاس ڀارت جي شرڪت نه ڪرڻ سبب ملتوي ٿي ويو، جنهن کان پوءِ سارڪ جو عمل اڳتي نه وڌي سگهيو. هن زور ڏنو ته ڀارت جو رويو خطي جي ترقي، امن ۽ گڏيل تعاون کي غير ضروري طور تي متاثر ڪري رهيو آهي، جنهن سبب سارڪ جي متبادل علائقائي فريم ورڪ تي غور وڌي رهيو آهي.
صدر چيو ته ايران ۽ چين جي ممڪن شموليت سان علاقائي رابطن ۾ وڌيڪ واڌارو اچي سگهي ٿو. پاڪستان جامع ۽ تعاون تي ٻڌل علائقائي نظام لاءِ پرعزم آهي ۽ واپار، ٽرانزٽ ۽ توانائي جي رابطن کي وڌائڻ لاءِ تيار آهي.
هن چيو ته خطي جا مسئلا گڏيل آهن، تنهن ڪري انهن جا حل به گڏيل هجڻ گهرجن. احترام ۽ تعاون سان ڏکڻ ايشيا وڌيڪ پرامن، مستحڪم ۽ خوشحال بڻجي سگهي ٿو.
